Tallo a naglabsing iti Anti-Tambay for Adults idiay Municipal Plaza Park, Poblacion, Banayoyo, Ilocos Sur ti binallaagan dagiti pannakabagi ti linteg.
Dagiti naglabsing ket agtawen iti duapulo, duapulo ket dua ken duapulo ket maysa nga agpapada a taga-Barangay Lopez, Banayoyo.
Iti pannaki-uman ti Bombo Radyo Vigan ken ni Police Captain Medward Galay iti Banayoyo Police Station, madama ti panagpatrolyada idi nakitada dagiti tallo nga agtamtambay iti parke ti ili.
Agiistorya dagitoy idi makita dagiti pannakabagi ti linteg ta segun kadakuada ket kagapgapuda a napan nangan.
Iti salinong ti nasao nga ordinansa, maiparit ti panagtambay iti alas dyes iti rabii agingga alas kuatro iti parbangon.
No matiliwanto pay dagiti tallo mamueltadanton iti P500 ta isu ti pannusa iti second offense P1,500 met ti third offense wenno pannakaibalud.
