Vigan City – Panaglabsing iti RA 9175 wenno Chain Saw Act of 2002 iti sanguen a kaso dagiti tallo a mannalon a nagputedda iti kayo babaen iti panagaramatda iti chainsaw idiay Sitio Barikir, Brgy. Nagsincaoan, Cabugao.
Nabigbig dagiti tallo a naglabsing a da Emerson Batara, agtawen ti tallo pulo ket dua, baro, mannalon; Emelyn Salamanca, agtawen ti uppat a pulo ket tallo, naasawaan, mannalon; ken Maximo Morales, agtawen ti lima pulo ket maysa, naasawaan, mannalon nga agpapada nga agnaed idiay Sitio Rebba, Barangay Cacadiran, Cabugao.
Nakaawat iti report ti Cabugao Municipal Police Station isu a nagrespondeda ket naaktuanda iti panagputed iti kayo iti narra dagiti tallo babaen iti panagaramatda iti chainsaw isu a kiniddawda iti permitda ngem awan iti naipakitada.
Gapu iti dayta ket nakemmeg dagiti tallo a mannalon ket naala kadakuada iti tallo nga unit iti chainsaw ken naputed a kayo iti narra para iti proper disposition.
