VIGAN CITY – Nakakustodiya kadagiti otoridad idiay ili ti Narvacan ti menor de edad a mapapati nga adda iti problema iti panagpanpanunut na a suspek iti panangtubtob ken nangukag iti pantsong idiay Barangay San Antonio, Narvacan idi naminsan nga aldaw.
Pakabuklan a walo a pantsong iti tinubtob ti suspek ngem ti laeng pantsong ti pimmusay a ni Barangay Captain Alex Antolin a kandidato ti kina-konsehal idi midterm elections iti nalukatan na ket inruwar na pay iti lungon sa na inpatakder ket inikkan na ti shades ti bangkay.
Segun ken ni Police Major Rogelio Miedes, hepe ti narvacan municipal police station, posible a sumango ti suspek iti kaso a malicious mischief ket makammon ton ti Department of Social Welfare and Development nu alaen da ti menor de edad tapnu ikustodiya da kadakuada gapu ta natay metten ti ina ti suspek ken saan na pay pulos a nakitkita ti ama na.
Naala dagiti otoridad manipud ti suspek iti martilyo a mapapati nga inaramat na, pakairamanan ti jacket ken wallet iti pimmusay a barangay chairman.
