VIGAN CITY – Desidido ti pamilya dagiti dua a biktima iti mapapati a panagrames iti agtawen iti sangapulo ket lima a lalaki ditoy syudad ti Vigan a makasoan ti suspek ken madusa iti maiyannatup ti inaramid na.
Segun iti maysa kadagiti ina dagiti dua a babbai nga agtawen iti pito, saan nga insigida nga inbaga kenkuana ti anak na iti napasamak agingga nga adda madlaw na nga ano iti underwear na ket idi sinaludsod na, naibaga ti biktima iti inaramid kenkuana ti suspek nga ibilang da payen a kabsat ta agkakapidwa da ken mapan da pay makipangpangan iti balay ti suspek.
Maibasar iti inbaga ti biktima ken ti ina na , inayaban isuna ti suspek ket napan da iti kwarto iti pagtaengan da nga isu iti nangramesan na kenkuana.
Kabayatanna, segun met iti maysa pay kadagiti ina ti biktima, idiay sirok iti salamagi nga asideg iti pagtaengan ti suspek iti mapapati a nangramesan na ken ti anak na a naamuan da laengen iti napasamak idi agalen ti anak na iti sakit iti mabagbagi na nu umisbo ket idi pinagpudno da, naibaga ti biktima nga inpursar ti suspek nga inserrek iti mabagbagi na iti mabagbagi ti biktima.
Dakkel met iti pammati ti ina ti suspek a dagiti mabuybuya ti anak na iti internet iti nakatuladan na iti inaramid na kadagiti biktima ngem kiniddaw na a saan kuman a maibalud ket maipan laengen ti salinong ti Department of Social Welfare and Development ngem pinaglibakan na pay nga adu dagiti saw-sawen da kontra ti pamilya dagiti biktima ta asideg la ket ngarud nga agkakabagyan da.
Inkari met ti kapitan iti barangay nga adalen da a naimbag nu kasanu a maipaserra iti computer shop a pappapanan ti suspek nga isu iti pakabuybuyaan na kadagiti videos a nakatuladan na iti inaramid na kadagiti biktima.
