Boluntaryo a simmuko kadagiti otoridad ti suspek a bimmagkong iti karrubana idiay Brgy. San Pedro, Sta. Lucia, Ilocos Sur.
Nabigbig ti biktima a ni Luciano Balopinos Sijuera, agtawen iti innem a pulo ket dua, mannalon ken residente iti Sta. Lucia idinto a suspek ket ni Renato Vilog Umaoeng, agtawen iti pitopulo ket innem, mannalon ken residente iti nasao a lugar.
Iti pannaki-uman ti Bombo Radyo Vigan ken ni Police Major Pol A. Areola, officer-in-charge iti Sta. Lucia Municipal Police Station, itulod koma ni Umaoeng ti biktima a nabartek ngem sabali ti pannaka-awatna iti naibaga kenkuana isu a nagsinnungbatda a gappuanan ti panangala ti suspek ti bareta ngem nalisyan ti biktima isu a nangala ti buneng ket inbagkongna a nakatamaan iti ulo, tengged ken likod ti biktima.
Naamiris ti suspek a madi ti naubrana isu a nagturong iti pagtaengan ni Remy Ambatang ket inaminna iti pasamak.
Insigida a napan ni Ambatang iti pagtaengan ti biktima a gappuanan ti pannakakitana ti biktima a dundunor isu nga impanda iti ospital para ti pannakatamingna ket iti agdama ket saan pay a makasao.
Narekubre ti bolo nga agrukod 22 inches nga inaramat ti suspek.
Iti agdama, manarimaan ti imbestigasyon dagiti otoridad inaig iti nasao a pasamak.
-Nesami Ryce Dela Cruz
