Nakemmeg ti maysa nga Street Level Individual babaen iti naiwayat a buy-bust operation idiay Barangay Binalayangan, Sto. Domingo, Ilocos Sur maibilang a Drug Cleared Barangay.
Ti suspek ket ni Freddie Sol Savellano, agtawen iti uppat a pulo ket lima, taga-Barangay Cuancabal, Cabugao.
Iti pannaki-uman ti Bombo Radyo Vigan ken ni Police Captain Joseph Fieldad, dua agingga tallo bulan a sinipsiputanda ti suspek iti iligal nga aramidna a daytoy ket mapan agilaklako iti iligal a droga iti ili ti Sto. Domingo.
Naala manipud kenkuana ti nasurok kumurang 0.9 grams ti mapapati a shabu nga aggatad iti PHP6,120 a naikabil iti maysa a sachet – maysa a sachet para iti buy-bust item ken dua a sachet ti ikot ti suspek.
Mayuray pay met ti resulta ti drug test-na tapno matakuatan no ti suspek ket agar-aramat pay iti iligal a droga.
Dagiti non drug evidence ket pakairamanan ti maysa a piraso ti genuine 1000-peso bill, dua a piraso ti genuine 1000-peso bill, maysa a piraso ti 500-peso bill, dua a piraso ti genuine one-hundred peso bill ken maysa a karton ti pusporo.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
