VIGAN CITY- Mabukel ti Special Investigation Task Group- Paa tapnu nadardaras a masolbar ken matutukan a nalaing iti pammaltog a nakatayan ni San Julian Sur, Vigan City barangay captain Orbil Paa idi kalman idiay Barangay Tamag, Vigan City.
Segun ken ni PSupt. Marlo Castillo, hepe ti Vigan City PNP, kitaen da amin a CCTV nga available kadagiti lugar a posible a limmabasan dagiti suspek agsipud ta ti mismo CCTV ti barangay a nakamuntar iti lugar a nakapasamakan iti pammaltog ket nadadael.
Malaksid iti dayta, nagpalagip ni Castillo a nu adda ti pammaltog a napaspasamak wennu anyaman a klase ti krimen ket saan a mabalin a pakibiyangan dagiti sibilyan dagiti banag a masarakan iti crime scene kas iti napasamak idi kalman a panangpidot iti maysa a tao ti 2 a kapsula a mapapati nga inaramat dagiti suspek iti krimen.
Maipalagip nga idi malem ti February 22, naggapu idiay Ilocos Sur Provincial Hospital-Gabriela Silang ni Paa idi adda dagiti mapapati a riding-in tandem suspects a nangparakapak kenkuana a poon iti nakatayan na.
