Im-imbestigaran ti Presidential Communications Office dagiti social media account a nagiwaras iti fake news maipanggep ti mapapati a pannakakemmeg ni Sen. Ronald ‘Bato’ Dela Rosa ken pannakaisangona iti International Criminal Court sadiay Netherlands.
Segun iti PCO, imbilin ni Communications Secretary Dave Gomez ti anti-fake news desk tapno maammuanda no asino ti nangiwaras iti damag ta saan a palabsen ti Malakanyang dagiti fake news.
Pinaglibakan ti Malakanyang ken ti Department of the Interior and Local Government (DILG) a natiliw ni Dela Rosa.
Segun kadakuada, agtultuloy pay laeng ti operasion iti panangbirok ken panangtiliw kenkuana.
Karaman ni Dela Rosa kadagiti akusaran ti ICC mainaig iti drug war idi panawen ti administrasion ni dati a Presidente Rodrigo Duterte.
Kalpasan a rimsua ti damag ti posible a warrant, naglemmeng idi 2025, ngem nagparang manen iti Senado sakbay a nagpukaw iti imatang ti publiko. Kleofe Jyna Dayag
