Nagiruar ti subpoena ti House Committee on Justice para kadagiti ‘sobre’ a maipagarup a nangikabilan dagiti kuwarta a naawat ti dati nga opisial ti Department of Education (DepEd) manipud ken ni Bise Presidente Sara Duterte.
Manamnama a maipresentar dagiti nadakamat a sobre iti impeachment proceedings inton Abril 14.
Maipalagip nga iti imbestigasion ti House Committee on Good Government and Public Accountability idi 2024 mainaig iti confidential funds ti bise presidente ken naibaga ni dati nga DepEd Undersecretary ken mangidadaulo idi ti Procuring Entity wenno HOPE Gloria Mercado a nakaawat isuna dagiti sobre manipud ken ni dati nga DepEd Assistant Secretary Sunshine Fajarda.
Segun pay ken ni Mercado, dagiti sobre ket maipagarup a naggapu ken ni VP Sara iti nagbaetan ti February 2023 agingga September 2023 a maipagarup a nakaawat isuna ti 9 a sobre nga adda nakaikabil nga HOPE.
Karaman iti kiniddaw ti komite ti affidavit ni Mercado ken ti dagiti nadakamat a sobre.
