Naalaan ti maysa nga street level individual iti 0.5 a gramo iti maatap a shabu ken maysa a gramo iti maatap a marijuana bayat iti search warrant operation idi kalman, August 4, 2026 idiay Barangay Tinaan, Sta. Maria, Ilocos Sur a drug-cleared barangay.
Ti akusado ket lalaki nga agtawen iti tallopulo ket tallo, baro, awanan ti trabaho nga agnaed iti nasao a lugar.
Insayangkat dagiti otoridad ti search warrant operation kontra ti akusado gapu iti panaglabsingna iti Republic Act 9165 kalpasan nga inruar ti Executive Judge iti Regional Trial Court Branch 72, First Judicial Region, Narvacan a napetsaan idi July 27, 2026.
Gapu dayta ket naala kenkuana ti drug evidence a 0.5 a gramo iti maatap a shabu nga aggatad ti P3,400 a naipan iti tallo a heat-sealed transparent plastic sachet ken maysa a gramo iti maatap a marijuana nga aggatad iti P120 a naipan iti maysa a transparent plastic sachet.
Dagiti non-drug evidence a naala ket pakairamanan ti maysa a pakete iti sigarilyo, uppat a piraso iti strip aluminum foil, maysa a posporo ken maysa a tissue paper.
