Pinasingkedan ni PLT. Ronie Corpuz ti Bantay Police Station a ti suspek a nakemmeg iti naiwayat a search warrant operation idiay Barangay Bulag East, Bantay, Ilocos Sur ket datin a nainaig iti iligal a droga.
Iti pannaki-uman ti Bombo Radyo Vigan ken ni Corpuz, mapatta-patta nga iti nagbaetan ti 2015 ken 2016 ket naalaan manen iti iligal a droga iti naiwayat a buy-bust operation ta imbes nga isardengna ti iligal nga aramidna kalpasan a nakaruar iti pagbaludan ket ad-adda pay a pimmigsa a nagilako iti iligal a droga.
Idi pay laeng Hulyo ken Setyembre ket iwayatanda koma pay iti buy-bust operation ngem saanda a nagballigi isu a search warrant ti impatungpalda.
Immunan a pinaglibakan ti ina ti suspek nga adda iti uneg ti pagtaenganda ti anakna, ngem ti kabsatna a babai ti nangipudno.
Maipalagip a naala manipud iti suspek ti nasurok-kumurang ti 8.36 grams ti mapapati a shabu nga aggatad iti ₱56,848 ken dadduma pay a maatap a drug paraphernalia.
Kabayatanna, agtultuloy met nga imbestigaran dagiti pannakabagi ti linteg ti mapapati a panangdangdangran ti suspek iti live-in partner-na.
