Immanamong ni Senador Joel Villanueva ti panawagan ni President Ferdinand Marcos Jr., nangruna kadagiti empleado ti gobyerno, iti simple a pannakarambak ti Paskua ita a tawen.
Inyunay-unay ni Villanueva a ti kaipapanan ti Paskua ket saan laeng a maipapan iti panagsagana ken sagut no di ket ti pananglaglagip iti pannakayanak ni Jesucristo.
Segun kenkuana a napateg a tulongan dagiti agkasapulan, nangruna dagiti umili a naapektaran iti nagsasaruno a bagyo ken kalamidad a limmasat iti pagilian.
Nagyaman pay ti senador kadagiti ahensia ti gobierno, lokal a gobierno ken iti pribado a sektor ken NGO nga agtultuloy a mangipapaay iti tulong kadagiti naapektaran ti bagyo.
Immuna a nagpanawagan ti Malacañang dagiti ahensia ti gobierno a liklikanda ti nagarbo a selebrasion ti Christmas Day, ta nasaysayaat nga idonar ti magastos kadagiti naapektaran ti agsasaruno a bagyo.
