VIGAN CITY – Inawaten ti provincial government ti Seal of Good Local Governance (SGLG) award iti maikapat a gundaway iti naisayangkat a National Awarding Ceremony idiay Manila Hotel idi November 4.
Nadakamat ni Governor Ryan Singson a ti inyawat kenkuana ni Department of the Interior and Local Government Secretary Eduardo Ano a pammadayaw ket ad-adda a mangguyugoy kenkuana a mangigagaed pay iti trabaho na para iti pagsayaatan iti probinsiya.
Ingunam-gunam ti gobernador a nu awan iti panagtitinnulong dagiti amin a kameng ti provincial government ket saan a magun-od ti Ilocos Sur ti maika-pat a SGLG award.
Agsipud iti dayta, nakaawat iti probinsiya ti performance challenge fund nga agdagup ti 4.5 milyon a pisos ket mapagpapatanganto no ania dagiti banag a pakailatangan iti nasao a gatad.
Kabayatanna, inlawlawag ni Año a ti pannakabigbig dagiti naduma-duma a probinsiya ken siyudad ket saan nga isu iti pagpatinggaan ti nasayaat a serbisyo dagiti LGU no di ket isu ti mangawis kadakuada nga itultuloy dagiti nasayaat a naaramidanda.
Malaksid iti provincial government, dagiti nakaawat pay ti SGLG award ditoy probinsiya ket ti syudad ti Vigan ken Candon, pakairamanan dagiti ili ti Bantay, Caoayan, Galimuyod, Magsingal, Quirino, San Esteban, San Ildefonso, San Juan, San Vicente, Santa, Santiago, Sta. Lucia, Sta. Catalina, Sta. Cruz, Sto. Domingo, Suyo ken Tagudin.
