VIGAN CITY – Maysa a senior citizen ti pinaltugan ti saan pay nabigbig a suspek idiay Barangay Balugang, Burgos, Ilocos Sur.
Nabigbig ti biktima a ni Fe Solison Rante, agtawen iti pitopulo ket dua, agnaed iti nasao a lugar.
Inreport ni Barangay Captain Warlito Directo iti Burgos Municipal Police Station a ti biktima ket napaltugan iti uneg ti pagtaenganda.
Naitarayen iti ospital ti biktima idi makasangpet dagiti pannakabagi ti linteg nga agresponde iti lugar.
Iti pannaki-uman ti Bombo Radyo Vigan ken ni Police Captain Melvin Trinidad manipud iti Burgos Municipal Police Station, dati nga Overseas Filipino Worker ti biktima nga adda sari-sari store -na iti balayda.
Iti imbestigasyon, pinaltugan ti suspek ti biktima idi inyawatna ti sigarilyo a ginatangna.
Tyan ti tama ti biktima ngem natalgeden ti kasasaadna idinto a ti met suspek ket naglibas kalpasan ti pasamak.
Narekobre iti nakapasamakan ti pammaltog ti dua nga empty shell ken dua nga slug.
Agtultuloy met ti panangduktal dagiti pannakabagi ti linteg iti posible a motibo ti krimen babaen iti panangalada kadagiti CCTV nga asideg iti balay ti biktima.
