VIGAN CITY – Awan ti foul play iti pannakatay ti maysa a senior citizen idiay Brgy Alincaoeg, Sta. Lucia a nagbekkel babaen iti tali a nsarakan ti bangkayna iti uneg ti pagtaenganda.
Nabigbig ti biktima a ni Marcelino Gapang Sr., agtawen iti innem a pulo ket lima, mannalon nga agnaed iti nasao a lugar a nagbekkel gapu iti amakna iti Covid19.
Iti pannaki-uman ti Bombo Radyo Vigan ken ni Pol. Capt. Juan Jhayr Maggay, adda saksakiten ti biktima ken saan a makaturturog iti rabii ta maburburiburan iti nakaituding a medical checkup ta amangan no positibo iti nasao a sakit.
Nupay kasta, natalek ti asawana a ni Josefina a nagpakamatay ti biktima ta iti rabiina ket agkaduada pay a naturog ngem idi pumarbangon ket nasarakannan a nakabitin ti asawana iti terrace da nga awanen ti biagna.
