Nadunor ti maysa a senior citizen a siklista kalpasan a makadinnungparna ti maysa a motorsiklo iti provincial road idiay Barangay Cadacad, Burgos, Ilocos Sur.
Karaman iti aksidente ti maysa a Yamaha Aerox 155 a minaneho ti lalaki nga agtawen iti duapulo, estudiante, agnaed iti Barangay Dayanki, Burgos. Kinalubbonna ti baba inga agtawen iti sangapulo ket walo, agnaed iti Barangay Balugang, Burgos.
Ti met senior citizen ket lalaki nga agtawen iti innem a pulo, agnaed iti Barangay Ampuagan, Sta. Maria.
Agpada nga agpapa-abagatan ti motorsiklo ken bisikleta. Idi gandaten ti motorsiklo nga ag-overtake iti bisikleta ken namin-ano a daras a panagbusinana, bigla a nagsikko iti kannigid ti siklista isu a nagdinnungparda.
Nadunor ti likudan ti ulo ti siklista idinto a nagsagaba met iti minor injuries ti kannigid nga ima ti drayber ti motorsiklo ken saan a naan-ano ti backrider.
Saan a nakainom dagiti dua a drayber ken naduktalan a nakapasar pay ti siklista iti seizure wenno panagkissiw.
