VIGAN CITY – Maysa a senior citizen a babai nga agtawen iti innem a pulo ket siam ti mapapati a nagtakaw iti sling bag a naglaun ti Php 16,120 manipud ti vegetable vendor idiay Public Market ti Brgy. Maynganay Sur, Sta. Maria, Ilocos Sur.
Nabigbig ti biktima a ni Trinidad Lizardo Gaspar, agtawen iti limapulo ket pito, vegetable vendor, ken residente ti Brgy. Tacac, Tagudin, Ilocos Sur.
Ti suspek ket agtawen iti innem a pulo ket siam, senior citizen, unemployed, ken residente ti Brgy. Casantaan, Santo Tomas, La Union, ken adda pay iti dua a saan pay a nabigbig a kaduana ti nakalibas.
Iti pannaki-uman ti Bombo Radyo Vigan kenni Police Lieutenant Jenson Refuerzo, Deputy Chief of Police ti Sta Maria Municipal Police Station, sakbay ti insidente, busy ti biktima nga aglaklako iti nateng, idinto maysa kadagiti suspek ti nagkiddaw iti lemon a prutas, ket gapu iti kinaadu dagiti aggatang, nasdaaw ti biktima ta ti sling bag na a naglaun iti dakkel a gatad ti kuarta ket adda iti sakaanan ti suspek ken innalana ti sling bag a mapanna ipan kadagiti kakaduana.
Gapu ta nakita ti biktima nga ikut ti suspek ti bag na, dagus a nagpukkaw ti “Mannanakaw” ket kinamatna ti suspek nga agliblibas, ngem natiliw ti suspek babaen ti tulong dagiti padana nga aglaklako.
Naglaon ti bag iti Php 16,120 a kuarta, National ID ti biktima, ken passbook a Summit Bank.
Segun kenni Police Lieutenant Refuerzo, umuna a gundaway a naaramid ti suspek iti nagtakaw ken awan iti maibagana a rason no apay a naaramidna daytoy, ken impatangkenna nga awan ti kaduanna
Maibasar pay iti imbestigasyon, iti public market ti Sta. Maria iti turong dagiti mannanakaw ta adu dagiti tattao a mapan aggatang kangrunaan no aldaw ti dominggo.
Innayon pay ni Police Lieutenant Refuerzo nga adda dagiti report a maaw-awatda nga adda mapukpukawan ken mataktakawan a vendors, isu ti kitkitaenda ti systems da no dagiti suspek ket isuda dagiti dati a matiltiliwan a mannanakaw.
Kabayatanna, nagdesisyon ti biktima a pilaanna ti kaso ti suspek.
