Inallukoy ti Senado ti Civil Service Commission (CSC) nga amyendaran ti pagannurotan a mangiparit iti online gambling kadagiti empleado ti gobierno ken civil service personnel.
Segun kadagiti senador, adu dagiti maisagsagmak itan gapu iti panagpusta babaen ti e-wallets ken online platforms, saan laeng a dagiti nataengan no diket pakairaman pay met dagiti agtutubo.
Nangipila dagiti senador ti nadumaduma a gakat tapno maipasardeng ti online gambling ken advertisement-na iti intero a pagilian kas ti Anti-Online Gambling Advertisement Act of 2025, Ban on Online Gambling Act, ken Anti-Online Gambling Act of 2025, nga indauloan da Senador Joel Villanueva, Senador Alan Peter Cayetano, Senador Pia Cayetano, Senador Risa Hontiveros, Senador Loren Legarda, ken Senador Migz Zubiri.
Nagriri met dagiti dadduma nga online gaming operator a lisensiyado ti Philippine Amusement and Gaming Corporation (PAGCOR) mainaig iti kapanunotan ta mabalin nga agusar dagiti Filipino kadagiti saan a regulated site a mabalin a makita iti black market.
