Binabalaw ni Senador Risa Hontiveros ti “Proyekto Dalisay” gapu iti panagiwarasda iti saan nga ususto nga impormasion maipapan iti Adolescent Pregnancy Prevention Bill nga agdama nga adda iti Senado.
Segun ti Senador, kinaulbod ti panagiwaras ti nasao a grupo a ti singasing ket peggad iti moralidad, societal ken spiritual values dagiti Pilipino.
Kangrunaan a binabalaw ti Senador dagiti alegasion a ti singasing ket mangi-promote iti sex education para kadagiti ubbing.
Inlawlawagn a ti sinagsing ket naibasar iti Responsible Parenthood and Reproductive Health Law, saan nga iti European sex education standards, ken saanna iparit dagiti nagannak a tarabayan dagiti annakda a sexually active.
Impaganetget ni Hontiveros a ti panggep ti nasao a gakat ket tapno mapapigsa ti proteksion dagiti ubbing gapu iti umad-adu a bilang dagiti ubbing nga agsiksikug.
Sinuportaran met ni Council for the Welfare of Children (CWC) Undersecretary Angelo Tapales ni Hontiveros, nga impaganetgetna ti pannakasapul a tamingen ti nasapa a panagsikog ken ti pannakapasa ti gakat.
