Awan ti makitkita a makanay a pagibasaran ni Senador Risa Hontiveros tapno palabsen ti posible a panang-isnab manen ni suspended Bamban, Tarlac Mayor Alice Guo iti hearing ti senado inton bigat.
Dayta ket kalpasan nga awaten ti kampo ti mayor babaen ken ni Atty. Nicole Jamilla idi July 5 ti subpoena a naipatulod kenkuana iti panagdengnge ti Senate Committee on Women.
Iti baet dayta iti saan a panangiserbi ti Senate Sgt at Arms gapu iti kinuna ti helper ti mayor a ni Jerry Castro a mano a lawas a saanen a mapmapan iti talon idiay Bamban ti amona.
Naiserbi pay met ti subpoena ken ni Nancy Gamo, accountant ni Mayor Guo ngem saan a naiserbi ti subpoena kada Shiela, Wesley ken ni Seimen Guo ken dagiti nagannakda a da Jian Jhang Guo ken Lin Wenyi.
Inkalintegan ni David and Jamilla Law Offices a saanda a kliyente dagiti nagannak ken kabsat ti mayor.
Nupay kasta, nagballaag ni Hontiveros a no saan nga ikaskaso ti mayor ti subpoena, karbengan ti senado ti agiruar iti warrant of arrest kontra kenkuana.
