Binalakadan ni self-confessed drug lord Kerwin Espinosa ni Senador Ronald “Bato” dela Rosa nga agbaliw ken liklikanan ti agaramid kadagiti senario a mangdadael kadagiti kalaban iti politika kabayatan iti maikawalo a hearing ti House Quad Committee
Daytoy ti mensahe ni Kerwin kalpasan nga imbutaktakna a ni Dela Rosa, dati a PNP Chief, ti nangibilin nga idawitna ni dati a Senador Leila de Lima iti illegal a droga.
Malaksid dayta, nagpanawagan pay ni Kerwin ken ni dati a Presidente Rodrigo Duterte nga i-validate-na dagiti naawatna a report ken saan nga agpasugsog kadagiti tattao iti aglawlawna.
Iti panagparangna iti imbestigasion ti Quad Committee seknan iti extra judicial killings iti sidong ti war on drugs, impaganetget ni Kerwin a ti laeng motibona ket ti hustisia para iti amana, dati nga Albuera, Leyte Mayor Rolando Espinosa a napapatay iti uneg ti pagbaludan idiay Baybay City Provincial Jail.
Kinapudnona, sisasagana ni Kerwin a tallikudanna iti ambisyonna iti politika nga agbalin a mayor ti Albuera a kasukat ti hustisia para iti amana.
