Nangipaay ti Sangguniang Kabataan idiay Barangay Rancho, Santa, Ilocos Sur iti school supplies para kadagiti agad-adal a kalugaranda.
Iti pannaki-uman ti Bombo Radyo Vigan ken ni SK Chairman Adrian Aquino, naragsak ti rikna iti tumulong uray bassit laeng ta patienna a dakkel a pakalag-anan dayta dagiti nagannak.
Segun ken ni Aquino, dagiti naikkan ti school supplies ket umabot iti 150 nga agad-adal manipod Kindergarten agingga College a kalugaranda.
Kinunana a kadagiti Elementarya ket naikkan ti glue, crayons, notebook, lapis, papel ken payong; kadagiti high school ket naikkan ti papel, ballpen ken payong; ken dagiti kolehio ket naipaayan ti yellow pad, ballpen, flash drive ken payong.
Ti nasao a programa ket nailatangan iti pondo tapno makatulong para kadagiti agad-adal iti nasao a barangay.
Imbingayna a naikkan amin nga estudyante iti payong tapno salaknibda manipod iti nabara a panawen ken iti mapaspasungadan a panagtutudo.
Manamnama a ti sumarsaruno a programa nga isayangkatda ket iti pannakaipaay ti emergency kits para kadagiti nasao met laeng a benepisyaryo a makatulong para iti masangsangwanan nga isasangbay iti didigra.
Kabayatanna, nagyaman ni Aquino kadagiti amin a tumultulong para iti pannakaipatungpal iti agduduma a programa iti Sangguniang Kabataan idiay Rancho ta no awanda ket narigat a mapasamak dagiti gagemda.
