VIGAN CITY – Nakasublin dagiti sangapulo ket pito a kameng ti Cabugao Police Station kalpasan iti pannakaidalanda iti seminar tapno maisubli ti moralda kalpasan iti pannaka-relieve da iti pwesto gapu ti pannakainaigda iti pannakatay ni Fabel Pineda idiay Daclapan, Cabugao.
Maipalagip a nakasoan idi da PCapt. Ramil Llarenas iti Cabugao PNP ken ni PCapt. Benjamin Raquedan iti San Juan PNP gapu ti mapapati a pannakarames kadagiti menor de edad a biktima.
Iti pannaki-uman ti Bombo Radyo Vigan ken ni PLt. Elison Pasamonte, officer in charge ti Cabugao Police Station, mayur-uray pay dagiti lima a nabati a dumaldalan pay laeng iti proseso nga isu ti maysa kadagiti paset ti programa ti Philippine National Police tapno maurnos no adda man dagiti parikut a sangsangwen dagiti kameng ti linteg.
Dua a lawas ti pannakaidalanda iti nasao a proseso ken nupay kasta, ingunamgunam ni Pasamonte nga uray pay no kasta ti napasamak iti grupoda ket nakasaganada latta nga agserbi ken mangsango iti aniaman a parikut a sumangbay kadakuada tapno maisubli met laeng ti talek ti publiko kadakuada.
