Patien ti maysa a rockstar lawyer nga imposible pay laeng a mawayawayaan ita ni dati a Presidente Rodrigo Duterte manipud iti pannakaibaludna iti International Criminal Court idiay The Hague, Netherlands gapu iti kaso a crimes against humanity.
Ti kaso ket adda pakainaiganna iti nadara a kampanya kontra iligal a droga idi panawen a nagtakem kas presidente.
Iti pannaki-uman ti Bombo Radyo Vigan ken ni Atty. Carlo Ybañez, imposible a patgan ti ICC ti kiddaw ni Duterte nga interim release gapu ta makitkitada a no nawayawayaanen ket posible a saanton a makasubli no paayabanto isuna ti nasao a korte.
Ti laeng tyansa a patienna a mabalin a mawayawayaan ni Duterte ket no maipasigurado ti abogado wenno dagiti mangsupsuporta iti dati a presidente a makasubli latta idiay The Hague no kas bilang.
Kunana pay a nasken a maallukoy ti ICC a saan a lemmengan ti dati a presidente ti kaso a sangsangwenna.
