Inlawlawag ti maysa a rockstar lawyer a mabalin a maibilang a grounds for suspension wenno pakaikkatan ni Senador Ronald ‘Bato’ Dela Rosa ti saanna nga iseserrek nga agtrabaho iti Senado.
Kasaruno dayta ti panangiwaragawag ni Ombudsman Jesus Crispin Remulla nga adda naawatna nga unofficial copy iti warrant of arrest ni Dela Rosa manipud iti International Criminal Court.
Iti pannaki-uman ti Bombo Radyo Vigan ken ni Atty. Carlo Ybañez, nailanad iti konstitusion adda karbengan ti Senado nangruna ti Ethics Committee a mangdisiplina kadagiti miembrona kas ken ni Senador Dela Rosa nga agsusueldo ngem saanna met nga ar-aramiden ti trabahona.
Innayonna a ti Senado ti mangdesision no kasano kadagsen ti pannusa a mabalinda nga ipataw iti senador.
Maipalagip a nangipila met ni Dela Rosa iti motion for temporary restraining order iti Supreme Court a mangkidkiddaw a saan nga ipatungpal ti warrant-na ken saanda nga ipan iti ICC.
Pending pay laeng ti nasao a mosion ngem saanen nga agpakpakita ti senador.
Kabayatanna, ti Office of the Solicitor General ket nangipila met iti Manifestation with Entry of Appearance iti Korte Suprema a ti kayatna a sawen ket isuda ti tumakder a pannaka-abogado iti petision ni dati a Presidente Rodrigo Duterte ken ni Dela Rosa mainaig iti pannakaipaimada iti ICC.
