VIGAN CITY – Riri gapu ti daga, dayta man iti rumrumwar a rason iti pammaltog a ti biktima ket ni Danilo Domingo Pantaleon, agtawen ti uppat a pulo ket lima, tricycle driver ken taga Barangay Margaay, Narvacan idi alas onse kinse iti rabii ti August 14.
Maibasar iti panagsalsaludsod dagiti kameng ti PNP- Narvacan ken ti asawa ti biktima a ni Amy, adda ti nangngeg na a putok ti paltog iti kusina da ket idi napan na kinita, napasagen ti asawa na gapu iti tama ti paltog iti ulo na ket mismo a nakita na a ti uliteg da a ni Benjamin Cabigon Cabotage ti nangpaltog ti asawa na.
Segun ken ni Pol. Capt. Arcadio Viloria, hepe ti Narvacan PNP, kinamat ni Amy ti suspek a ni Cabotage ta nagtaray ngem pinaturungan ti suspek iti paltog isuna isu a saan nan a kinamat.
Agingga itatta, sap-sapulen pay laeng dagiti otoridad ti suspek a naglibas kalpasan iti pammaltog.
Maob-obserbaran pay laeng biktima iti Intensive Care Unit ti Ilocos Sur Provincial Hospital- Gabriela Silang.
