VIGAN CITY – Immapela ni Police Lt. Jerry Arzabal, hepe ti Sugpon municipal police station kadagiti agmulmula ti marijuana ken dagiti maka-ammo nu siasino dagiti agmulmula iti marijuana idiay Sugpon nga isardeng dan iti aramid da ken makitinnulong da kadakuada tapnu maparmek iti panagraira iti marijuana iti lugar da.
Dayta ket kasaruno pay laeng iti balligi nga operasyon ti Philippine Drug Enforcement Agency- Regional Drug Enforcement Unit (RDEU) ti Region 1 ken Sugpon PNP iti panangdadael da ti mula a marijuana iti mapapati a marijuana plantation idiay Barangay Caoayan, Sugpon.
Mapatta-patta a sangapulo ribo a poon ti fully-grown marijuana iti dinadael dagiti otoridad iti nasao a plantasyon a ti kalawa na ket sangaribo uppat a gasut a metro kwadrado.
Inaklon met ni Arzabal nga awan pay iti atapen da nga akin-kukua iti nasao a nagmulaan iti marijuana ken nu siasino iti responsable iti nasao a banag ta awan met iti maitudo dagiti agindeg iti lugar.
