VIGAN CITY – Negatibo ti resulta iti swab test a dimmalanan dagiti amin a nakapulapol ti maika innem a pulo ket uppat a kaso ti Ilocos Sur a ti pasyente ket agtawen iti duapulo ket uppat a babai a taga- Brgy. Conconing East, Sta. Lucia, housewife ken locally stranded individual a saan a naikammayet kadagiti maseknan nga opisial iti nasao nga ili.
Nagpanateng ken nakarikna iti sore throat ti pasyente nga adda iti travel history-na iti National Capital Region ken adda exposure na kadagiti lugar a narisgo iti Covid19.
Gapu ti dayta, maragsakan ti Sta. Lucia Rural Health Unit a nangiwaragawag iti panagnegatibo iti nasao sakit dagiti nakapulapolna ken namnamaenda a negatibo met laeng ti pasyente iti maikadua a resulta ti swab testing a dimmalananna.
Nupay kasta, kiddawen ni Mayor Joseph Simon Valdez iti panagridam dagiti umili ken panangsurotda kadagiti pagannurotan tapno agbalinen a COVID-free ti ilida ken agsublin ti normal ti kasasaad ti tunggal maysa.
