VIGAN CITY – Mayur-uray ti resulta iti maikatlo a dimmalanan a test ti pasyente a nagpositibo iti COVID19 idiay Sevilla, Sta. Cruz a maysa a nurse iti Candon City St. De Porres Hospital.
Segun ken ni Senior Development Officer Sarah Pacquing, nagnegatibon ti resulta iti testing dagiti amin nga empleyado iti nasao nga ospital a nakapulapol ti pasyente.
Inlawlawag ni Pacquing nga agsipud idi natakuatanen a nagpositibo iti maysa a kameng ti ospital a pagub-ubraanda ket insigida a nangiyetnagda kadagiti pagannurotan a rumbeng a masurot tapno saan nga agwaras iti virus.
June 1 idi nangisayangkatdan ti panangbigbig, panang-isolate ken panang-test kadagiti sangapulo ket dua a nakapulapol ti pasyente a nagpositibo iti nasao a sakit ket idi June 2, naidalanda amin iti swab testing.
Kabayatanna, pinasingkedan ti kameng ti nasao nga ospital a sursurotenda amin dagiti inyetnag ti Inter Agency Task Force tapno natalged latta iti tunggal maysa kadakuada ken tapno malapdan ti virus.
