VIGAN CITY- “Agbalin a responsable iti panagusar ti social media tapno saan a makadadael ti sabali a tao ken saan a mangipaay ti alarma iti publiko” ,dayta iti inbalakad ni PS/Insp. Christopher Ramat,chief of police ti Sta. catalina municipal police station (MPS) kalpasan a napaneknekan da a ti van a nagviral iti social media ket saan a pudno a lugan dagiti ‘kumaw’ wenno dagiti agal-ala ti ubbing.
Segun kenni Ramat, awan ti kinagpaysuna ti ‘kumaw’ ta awan pay ti naireport a nabiktima da iti intero a probinsiya ngem nupay kasta ket binalakadan na dagiti nagannak nga agalerto ken kanayon a palagipan dagiti annak da a saan a sumurot kadagiti tattao a saan da a kaam-ammo.
Idi kalman ket pinasardeng dagiti kapulisan ti Toyota hi-ace commuter van nga agmaris ti silver metalic , ti plate number na ket VD 8555 ta kapada na ti lugan a nagwaras iti social media a mapapati nga us-usaren dagiti kumaw ngem naduktalan a ti nakalugan ket aglaklako laeng ti folded chair a da Diego Edaniol , nengosyante ken taga Salcedo, Eastern Samar, ken da Ronnel Alvarez ; Roland Lim Culob; Reggie Sanggasisa ; John Roa; ken maysa a menor de edad nga agpapada a taga 2712, Pinagkaisa St., Brgy. Commonwealth, Quezon City.
Kalpasan ti ocular inspection ket nawayawayaan dagiti nasao nga indibidwal ta nakaipakita da ti naan-anay a dokumento ken na-clear da iti record .
Kinuna ni ramat a naupay dagiti nasao nga indibidwal ta awan met ti dakes nga intensyon da no di ket aglako laeng ngem saan da nga ammo a nagviral gayamen ti van da ta naakusaran a lugan dagiti ‘kumaw’.
