VIGAN CITY – Masapul a saganaan a naimbag iti gobiyerno iti posible a mandatory repatriation kadagiti documented ken undocumented Filipino idiay Middle East nu kumaro iti saan a panagkinnaawatan ti Iran ken Amerika.
Narubruban iti saan a panagkinnaawatan ti Amerika ken Iran gapu iti panangibilin ni US president Donald Trump iti pannakapapatay iti kangatoan nga Iranian military official iti panagraut a naisayangkat idiay Baghdad International Airport.
Ti pannaki-uman ti Bombo Radyo Vigan ken ni dati nga ACT-OFW Partylist Rep. John Bertiz, masapul nga adda iti inventory nu manu ti bilang dagiti Pilipino idiay Iran ken dagiti pagtaengan nga ayan da ta nu masapul a maibakwit da ket nalaklaka iti panangtuntunan da kadakuada.
Mainaig dayta, mangipila da Bertiz ken dagiti kakadua na iti resolusyon idiay Kamara ken makikinnammayet da kadagiti sabali pay a miyembro ti kongreso tapnu mabantayan da iti kasasaad dagiti Pilipino nga adda idiay Middle East ken uray dagiti mapan pay laeng iti nasao a lugar.
Nagballaag ni Bertiz kadagiti recruitment agency ditoy pagilian a nu maisagmak dagiti Pilipino nga ipatulod da idiay ballasiw taaw, nangruna idiay Iran, mabalin a maibabawi iti lisensya da ken saan dan ton a pulos a makapag-operate.
