Inyarig ni Bicol Saro Partylist Rep. Terry Ridon ti isyu kadagiti immuna a kontrobersiya kas ti Napoles pork barrel scam ken fertilizer fund scam, ti confidential funds ni Vice President Sara Duterte gapu ti maipagarup a kuwestionable a benepisyaryo ken kinakurang ti dokumento a mang-suportar iti panagaramat ti pondo.
Segun ken ni Ridon, addan iti kampo ni VP Sara ti responsibilidad a sungbatan dagiti natakuatan ti Commission on Audit mainaig iti maipagarup nga irregularidad iti P612.5 milyon confidential funds.
Inawagan met ti agpampanday linteg dagiti opisial ti Department of Education ken Office of the Vice President a ‘napuskol ti rupa’ mainaig iti irregular a COA meeting.
Pinasingkedan ni Ridon nga awan ti karbengan dagiti nadakamat nga opisial nga agkiddaw iti COA ti audit query imbes nga audit observation.
