Pinasingkedan ni Representative Gerville Luistro a naan-anayen iti pannaka-convict iti uray maysa laeng nga article ti impeachment tapno maikkat iti puwesto ken ma-disqualify iti panangiggem ti aniaman a posision iti gobierno ni Vice President Sara Duterte.
Segun ken ni Luistro, agbotos ti Senado kas impeachment court iti tunggal article kalpasan a maipresentar ti ebidensia iti uppat a reklamo kontra ken ni VP Sara.
Pakairaman daytoy iti isyu ti confidential funds, panagpasuksok, saan a maipalawag a baknang ken maipagarup a panag-pangta.
Inlawlawag ti agpampanday linteg a no makaala ti 16 a botos iti maysa nga article, naan-anay daytoyen tapno ma-convict ti maysa nga impeachable official ken maipataw ti dusa a perpetual disqualification iti panangiggem ti pampubliko a posision.
