VIGAN CITY- Ad-adalen ti University of Northern Philippines (UNP) iti posible a pannakaisayangkat ti regular random drug test kadagiti estudyante gapu ti pannakakemmeg iti maysa a buy-bust operation idi March 5 ni Rusty Kevin Raquel nga agtawen iti dua pulo ket uppat, graduating student ti BS Mathematics gapu ti mapapati a panaglako ken panagaramat na ti marijuana.
Segun ken ni UNP President Dr. Gilbert Arce, adda ti plano da idi a mangisayangkat ti random drug test kadagiti amin nga estudyante ngem nangina isu a saan a natuloy ngem kadagiti kurso a BS Criminology ken health-related courses ket adda ti random drug test a maisaysayangkat.
Inbaga ni Dr. Arce nga iyuray da pay nu anya ti resulta iti imbestigasyon ket nu mapaneknekan a nagbasol ni Raquel ket makonbiktaran, posible a saan a makaturpos ta saan nan a maileppas dagiti amin a requirements iti maysa a graduating student ngem nu la ketdi ta maikkan iti gundaway a makapagpiyansa ken maileppas na amin a requirements ket makamartsa latta isuna kas kadagiti sabali a graduating student ti UNP.
Inpasigurado met ti UNP President a ti pannakakemmeg ti maysa nga estudyante da ket saan a makaapekto iti kalikagum da a maideklerar a drug-free university ti pagadalan ta ti nakakemmegan ti suspek ket iti met ruwar ti UNP ket saan a dagiti pagannurutan iti pagadalan ti linabsing na nu di ket iti linteg ditoy pagilian inaig iti panagaramat, panagikot ken panaglakoan ti iligal a droga kas ti marijuana.
