Insingasing ni Quezon City Rep. Patrick Michael Vargas ti pannakaipatakder ti Refuge and Assistance Centers para kadagiti masikug a pinanawan ti asawada tapno matulongan ken matutukan ida.
Gapu dayta, nagkiddaw ti kongresista iti liderato ti Kongreso a Mapabileg ti House Bill 3413 wenno Young Women’s Refuge and Assistance Center Act.
Kiniddaw pay ni Vargas iti Kongreso a maipangruna ti House Bill 3404 wenno Free Childcare Services Act tapno matulongan dagiti nabaybay-an a masikug iti panangipasigurado iti kinatalgedda iti maladaga nga ipasngayda.
Babaen iti gakat ket mangipatakder ti gobierno iti Refuge and Assistance Center iti kada probinsia, siudad, ken ili iti intero a pagilian para kadagiti masikug nga agtawen iti duapulo ket maysa agpababa a binaybay-an dagiti partner-da.
Gagem dagiti center a masigurado a maited kadakuada ti amin a tulong medikal a kasapulanda bayat ti panagsikugda kagiddan ti pannakaisuro kadakuada no kasano ti maaddaan iti pagsapulan.
Kayat pay ti kongresista a matulongan dagiti solo parent, nangruna dagiti marigrigat iti panangpadakkel kadagiti annakda agingga a madanon ti 3 ti tawen dagiti ubing.
