VIGAN CITY – Saan pay laeng a nakapap-papati para iti Rank 6 ti Certified Public Accountant Licensure Exam a ni Marjolyn Estrada, manipud Lingayen, Pangasinan a mairaman isuna kadagiti topnotchers.
Ni Estrada ket nagturpos manipud iti Kingfisher School of Business & Finance.
Iti pannaki-uman ti Bombo Radyo Vigan ken ni Estrada, ti laeng kiniddawna ket makapasa isu a dakkel a pagyamanna ta sobra ti inted ti Dios kenkuana a bendisyon.
Ti pannakaiyadayona iti pamiliana ti ibilangna a maysa kadagiti karigatan a paset ti pananggun-odna kadagiti arapaapna ta agmaymaysa isuna idi iti pagdagdagusanna idiay Manila idi agad-adal.
Kunana a nakarikna latta iti pressure agsipud ta nagturpos nga adda Latin honor na isu a kaamakna no saan a pumasa.
Isagsagutna met ti balligina iti Dios a nangtartarabay kenkuana ken dagiti nagannakna a nangsupsuporta kenkuana.
Balakadna kadagiti saan a napagasatan iti exam a pasublienda manen ti kumpiansada iti bagi ta addanto latta ti husto a tiempo nga ituding kadakuada ti Dios.
