Manamnama a sumango iti umuna a gundaway iti House Committee on Justice ti mapapati a bagman ni Bise Presidente Sara Duterte a ni Ramil Madriaga.
Daytoy ket malpas a napatulodan ti tapno tumabuno iti panagdengngeg ti komite iti impeachment complaint kontra ken ni VP Sara.
Imbilin ti komite ni Madriaga nga itugot ti original copy ti affidavit idi November 29, 2025 ken dagiti ebidensia nga iggem na.
Mapapati a naka-detalye iti affidavit ni Madriaga no kasano a nausar ti confidential funds ti Office of the Vice President, ken Department of Education idi 2022 ken 2023.
Iti agdama ket nakabalud ni Madriaga iti Camp Bagong Diwa idiay Taguig City isu a nakibinnulig ti komite iti Bureau of Jail Management and Penology (BJMP) para iti panagdengngeg ti impeachment complaint kontra ken ni Duterte.
