Nangirusat ti La Union Division Schools Office iti kaunaan a QR code a naawagan iti Learner Rights and Protection nga isu ti mabalin a pangidatagan dagiti delegado kadagiti pakaseknanda kabayatan ti Region 1 Athletic Association Meet (R1AA) nga in-host ti Candon City ita a tawen.
Iti pannaki-uman ti Bombo Radyo Vigan ken ni Juan Villarin Jr., Learner Rights and Protection Advocate, kalikagum ti nasao nga addang a masalwadan dagiti agad-adal manipud iti physical, verbal, psychological, emotional abuse ken dadduma pay.
Gapu ta nadumaduma ti billeting schools nga ayanda, makatulong iti maminsan a panang-scan iti QR code tapno maammuan no adda ti urgent concern wenno parikut a mabalinda a masulbar nga insigida.
Kabayatanna, nagyaman met ti intero a delegasion ti La Union iti nabara a pannakapasangbayda iti host venue agsipud ta naipaayanda kadagiti kasapulanda kas ti hygiene kit ken taraon.
Pinagyamananda pay met ti La Union Provincial Government a nangted kadakuada iti allowance ken suporta.
Namnamaenda nga ita a tawen ket maingatoda ti ranggoda a maika-siam idi napan a tawen.
