Binanatan ti raliyista a nag-viral kalpasan a madillaw ti kilikilina bayat a nakangato ti gemgemna iti protesta idiay Luneta.
Imbes a mabain, natured a sinungbatan ni Nathalie Julia Geralde ti pannakadillaw ti kilikilina a natural nga adda buok ken discoloration.
Segun ken ni Nathalie, saan pulos a nakababain ti bagi a lumablaban para iti maysa a patas ken anti-korap a masangwanan.
Kunana nga iti uneg ti kagimungan a maibalbalud dagiti babai iti saan a husto a pagrukodan iti kinapintas, ad-adda pay a kasapulan nga ingato ti gemgem ken ilaban ti karbengan.
Innayonna pay a ti pudno a pintas ti babai ket saan a marukod iti langana iti ruar wenno diktar dagiti produkto ti industria a makapaspastrek manipud iti insecurities dagiti babai.
Panawagan ni Geralde iti publiko nga ipokusda ti atensionda kadagiti napateg a patangan kas ti panangdusa kadagiti korap nga opisial, saan ket a ti pisikal a langa dagiti aktibista.
