VIGAN CITY – Nakalasat iti Tagudin border control checkpoint ti maysa a babai a pulis nga agtawen iti duapulo ket uppat a naidestino iti Police Regional Office 1 a nagpositibo iti Covid19 swab test ta daan ti impakitana a dokumento iti Covid19 test a dimmalananna.
Iti pannaki-uman ti Bombo Radyo Vigan ken ni Dr. Joy Villanueva, Co-head ti Covid19 Task Force, Candon City, October 22 a naidalan iti swab testing idiay San Fernando, La Union ti pasyente ngem nagawid idiay Patpata 2nd, Candon City a saanna pay a naala ti resultana ta ti impakitana iti checkpoint ket ti RT PCR test result na pay laeng idi September ken saanen a naidalan iti antigen test.
Nangarkila ti Taxi ti nasao a pasyente nga isu ti naglugananna a nagawid agingga idiay Tagudin ket idi nakadanun, nagluganen ti traysikel a nagawid iti lugarda ta agkasangay ti inana idi October 24.
Saan a naikammayet iti LGU-Candon ti pasyente ken iti barangayda ket idi October 23, napan pay isuna iti kapitanda ken nangan iti maysa a fastfood chain.
Adu ti nakapulapol ti pasyente nga itan ket naka – isolate iti Narvacan District Hospital kabayatan iti pannakaisayangkat ti contact tracing kadagiti nakapulapolna.
