VIGAN CITY – Inyebkas ni Provincial Quarantine Officer Martel Quitoriano a saan a ti trabaho da iti pakabannugan da nu di ket mabannug da kadagiti pammabalaw kadakuada dagiti tattao uray nu ar-aramiden da amin a kabaelan da tapnu maaramid iti pagrebbengan da nangruna iti panagbantay kadagiti quarantine checkpoint tapnu saan a maiserrek dagiti produkto a mabalin a makaapekto iti negosyo ken dadduma pay a produkto ditoy probinsiya.
Kayat ni Quitoriano nga imbes nga agsao-sao dagiti dadduma, tumulong da laengen kadakuada tapnu makemmeg wennu maala dagiti produkto nga iligal a maiserrek ditoy probinsiya.
Kinunana, mabalin met a nu adda makita dagiti tattao a mapagduduwaan a lugan ken atapen da nga adda nagyan na a kontrabando ket ipakaammo da nga insigida kadagiti pannakabagi ti linteg tapnu makita a naimbag.
Idi alas nuwebe y media iti agsapa idi October 8, maysa a Foton close van a minaneho ni Apolonio Ridao nga agtawen ti tallo pulo ket lima nga agnaed idiay Bayubay Sur, San Vicente iti nasalamaan da nga agiserrek kuma iti naduma-duma a meat products kas ti hamburger patty, beef patty, bacon ken chicken hotdog.
Pinasingkedan ni Quitoriano a malaksid a tampered iti dokumento dagiti nasao a produkto, saan da pay a nagpatatak idiay Pangasinan ken La Union a maysa kadagiti requirement tunggal adda iti maiserrek a produkto nga aggapu iti sabali a probinsiya.
