Ad-adalen ti Malakanyang ti gakat iti panangipatungpal ti price freeze kadagiti produkto petrolyo iti baet ti mapagam-amkan nga epekto iti suplay ken presio ti langis gapu iti riribuk iti Middle East.
Segun ken ni Palace Press Officer Claire Castro, impasigurado ti gobierno nga agbalin a balanse ti ania man nga addang tapno masalwadan ti kasasaad ti publiko ken ti oil industry.
Dayta ti kinuna ni Castro kadagiti saludsod iti decision ni Presidente Ferdinand Marcos Jr. a mangideklarar iti state of national energy emergency iti baet ti nalawlaw a state of emergency gapu iti riribuk iti Gulf region.
Bigbigen ti Palace Press Officer ti kinapateg ti deklarasion ti energy emergency tapno masolusyonan ti parikut iti suplay ti langis a mangap-apektar iti availability ken presiona iti pagilian.
