Kayat ni Senador Chiz Escudero nga ikonsiderar dagiti pribado a kompania ti 4-day work week kalpasan nga impakaammo ni Pres. Ferdinand Marcos Jr. ti pannakaipatungpal ti nasao a working arrangement kadagiti government employees tapno makissayan ti epekto iti panagpangato ti presyo iti langis gapu iti riribok idiay Middle East.
Impaganetget ni Escudero a ti nasapa a tignay gapu iti manamnama a posible nga epekto ti krisis idiay Middle East ket mangpapigsa iti kinatibker iti pagilian iti kumarkaru a tensyon.
Segun ti senador, ti nasao a flexible arrangement ket makatulong tapno makissayan ti inaldaw-aldaw a demand iti transportasyon, makissayan ti operating costs dagiti kompania, mangted ti bassit a nam-ay kadagiti mangmangged, ken maibaba ti binilion a pisos a mabalin a mapukaw a sapul iti pagilian gapu iti nakaru a traffic.
Kangrunaan nga inallukoy ni Escudero dagiti private companies idiay Makati ken Bonifacio Global City nga i-explore ti flexible setups tapno makissayan ti peak-hour congestion iti lugar.
