VIGAN CITY – Kinantyawan ni Presidente Rodrigo Duterte ni Narvacan Mayor Luis “Chavit” Singson gapu iti nagwaras a video na iti internet a matmaturog ken ngan-ngani nagsadag iti abaga ni 2018 Miss Universe Catriona Magnayon Gray idi laban ni fighting sen. Manny Pacquiao idiay Las Vegas, Nevada.
Ti panagsarita ni Presidente Duterte iti inagurasyon iti baro a by-pass road ti Candon City, inyangaw na nga awan iti sabali a maibaga na ken ni Singson nu saan a ti good luck ken inton maminsan ket matuloy to kuman iti sumaruno a plano na a banag a kinatawaan laeng ti mayor ken uray dagiti immatendar iti nasao nga aktibidad.
Ti nasao a video, agab-abay a nakatugaw da Catriona kenni Singson a matmaturog ket ngan-ngani nagsadag ken ti balasang ngem nakariing.
Babaen iti statement nga inpatulod ti mayor iti Bombo Radyo Vigan, naibaga na a nagpadispensar isuna ken ti balasang ta naturugan na iti pintas na gapu ti bannug na iti biyahe wennu jet lag.
Kinunana, nagangaw met iti balasang kenkuana ket inbaga na nga inton maminsan ket isunan to met iti maturog ket pagsadagan nanto met iti abaga iti opisyal.
Maipalagip a ni Singson a maysa kadagiti main sponsor ti Miss Universe Organization ken ti MUO iti nangitugot ken ni Catriona idiay Las Vegas para iti laban ni Pacquiao ket isuna iti nagserbi a flag bearer ti boksingero.
