VIGAN CITY – Inulit laeng ni Presidente Rodrigo Duterte iti sangwanan dagiti gobernador, municipal ken city mayor iti taripnong da idi rabii ti Martes, July 23, nu anya dagiti sumagmamano a nadakamat na iti maikapat a State of the Nation Address na idi Lunes, July 22.
Ti mensahe nga inpatulod ni Interior and Local Government Undersecretary Epimaco Densing III iti Bombo Radyo Vigan, inbaga na nga inbilin ni Presidente Duterte kadagiti local chief executive iti pagilian a liklikan da iti mairaman iti transaksyon iti iligal a droga ditoy pagilian ta nu siasinuman iti mapaneknekan a guilty iti dakes nga aramid ket sigurado a patayen na ida.
Malaksid pay iti dayta, inulit pay iti presidente a kayat na a maparmek iti kurapsyon nga isu iti maysa kadagiti nakaro a pakaup-upayan na.
Maysa pay kadagiti nadakamat iti presidente kadagiti local chief executive ket iti panangpapartak da iti proseso iti panangala iti publiko kadagiti kasapulan da a permit wennu dokumento.
Kinuna ni Densing, kayat iti presidente a ti uneg iti nabatbati a tallo a tawen na iti termino ket malpas na dagiti inkari na kadagiti tattao isu a kidkiddawen na iti pannakikinnammayet kenkuana dagiti opisyal dagiti LGU.
