Nalawag para ken ni House Deputy Minority Leader ken ACT Teachers Partylist Rep. Antonio Tinio a saan a makanay ti panangted laeng iti ayuda kas sungbat ti Marcos administration para kadagiti drayber iti pampubliko a transportasion.
Dayta ti impadanon ni Tinio kadagiti jeepney operator ken drayber a sumali iti nationwide transport strike.
Iti panagbisitana kadagiti strike center, napaliiw ni Tinio a ti dati a P1,050 a mayaw-awid a pastrek ti drayber ket bimmaba itan iti P250 ken posible pay a bumaba gapu iti agtultuloy a panagpangina ti presio ti krudo.
Segun ken ni Tinio, ad-adda pay a makaparurod ti saan a panangipatungpal ni Presidente Ferdinand Marcos Jr iti piso a nayon a plete.
Binabalaw ni Tinio a ti panangted iti P5,000 a tulong manipud iti Department of Social Welfare and Development nga imbes nga idirekta nga ited kadagiti drayber ket maidalan pay kadagiti operator isu a saanda a dagus a maawat.
