Inlawlawag ti Malakanyang a suportaran latta ni Pres. Ferdinand Marcos Jr. ti pannakaipatungpal ti K-12 program iti laksid ti pannakadismayana gapu ta saan a nakaala ti trabaho dagiti SHS graduate.
Segun ken ni Palace Press Officer Claire Castro, ibagbaga laeng ti presidente a saan nga epektibo ti K-12 ta saan a naisagana dagiti ahensya iti pannakaipatungpalna.
Kinuna nga agingga adda linteg para iti implementasyon ket rumbeng a mapasayaat pay.
Imbilin ti presidente iti Department of Education (DepEd) a pasayaaten pay ti K-12 curriculum tapno maisagana dagiti estudyante iti panagtrabaho ken maliklika ti job mismatch.
Kinissayanen ti DepEd ti core subjects iti baro a curriculum ti Senior High School Program, manipod iti sangapulo ket lima a subjects agturong iti lima a core subjects.
Nakatutok itan ti effective communication, life skills, general mathematics, general science ken history.
