Awan pay ti pinal a posisyon ni Pres. Ferdinand Marcos Jr. iti gakat nga ibaba ti sangapulo ket dua a tawen ti criminal responsibility.
Segun ken ni Palace Press Officer Claire Castro, no dayta iti maisingasing ket maibilang dayta a reasonable age.
Iti salinong iti agdama a Juvenile Justice and Welfare Act wenno Republic Act 9344, dagiti agtawen iti sangapulo ket lima agpababa ket exempted iti criminal liability, malaksid no mapaneknekan nga adda discernment iti oras a panaglabsing.
Para met kadagiti nasurok sangapulo ket lima iti tawenna ngem awan pay iti sangapulo ket walo a tawen, posible a madusa no mapaneknekan nga adda discernment, ngem mabalin latta a dumalan ti intervention programs imbes a regular a proseso iti korte.
Innayon ni Castro a kasapulan latta a maadal ti patangan sakbay a maaddaan ti pinal a desisyon ti presidente.
