Impakaammo ni Pres. Ferdinand Marcos Jr. nga awan ti Pilipino a naireport a natay wenno nadunor iti naisayangkat a joint combat operations iti nagbaetan ti Amerika ken Israel kontra iti Iran.
Dayta ket iti baet iti pakaammo a natay iti airstrike ti Supreme Leader iti Iran ni Ayatollah Ali Khamenei.
Nagmensahe ni Pres. Marcos iti kumarkaru a tensyon idiay Middle East kalpasan a binomba iti Israel ken Amerika iti Iran ken nagibales met iti Iran babaen ti panagatake kadagiti base iti Amerika idiay United Arab Emirates, Bahrain, Oman ken Israel.
Segun ken ni Pres Marcos, insigida a nagmonitor ti gobierno babaen kadagiti embahada ken labor attaché iti rehiyon tapno siguradoen ti kasasaad dagiti Pilipino iti nasao a pagilian.
Kinuna ti presidente, nga agingga alas nuebe itay bigat ket awan ti Pilipino a natay wenno nadangran iti panagatake.
Kabayatanna, binilin ni Pres. Marcos ti Department of Foreign Affairs ken Department of Migrant Workers (DMW) nga ipatungpal amin a contingency plans tapno masigurado ti kinatalged dagiti Pilipino iti Middle East kasaruno iti airstrike idiay Iran.
