Binilin ni Pres. Ferdinand Marcos Jr. iti amin nga ahensia iti gobierno nga insigida a mangipatungpal ti preemptive measure bayat nga umas-asideg iti Philippine Area of Responsibility (PAR) ti Super Typhoon Bavi a maawagan a Bagyong Inday apaman a makastrek iti pagilian.
Segun ken ni Palace Press Officer Claire Castro, binilin ti presidente ti National Disaster Risk Reduction and Management Council ken dadduma pay a maseknan nga ahensia a mangipatungpal ti whole-of-government approach tapno masigurado ti kinatalged iti publiko sakbay pay a dumuprak iti bagyo.
Karaman kadagiti naibilin ti pannakaisayangkat ti pre-disaster risk assessment, scenario planning ken panagsagana kadagiti national ken regional disaster response team.
Maipatungpal ti preemptive evacuation kadagiti lugar a nangato ti peggad iti nakaru nga angin, panaglayos ken panagreggaay iti daga.
Karaman iti panagsagana ti panangsigurado ti panagsagana dagiti evacuation center, pannakaipan ti rescue teams ken relief goods kadagiti strategic area, panagsagana iti alternatibo a ruta iti transportasion, pannakaipatungpal ti sea travel restrictions, inspeksyon kadagiti kritikal nga imprastruktura ken insigida a panagtulong kadagiti kangrunaan nga apektado a sektor.
Manamnama a sumrek ti bagyo iti PAR iti nagbaetan ti Martes iti rabii ken Mierkules iti bigat inton July 8, a maawagan a Bagyo Inday.
